باردو 1: الإعتصام والإعتصام المُضاد

الحكاية بدات على الفايسبوك، مع شبكة دستورنا اللّي متكونة من برشا ناس تفهم في القانون و زميمهم هو جوهر بن مبارك. حلّو إڢنمون عل فايسبوك و لمّو 4000 رقبة. الإعتصام بدا نهار 30 نوفمبر وهاذي المطالب

ـ ضرورة الفصل بين السّلط وتمكين كلّ سلطة من صلاحيّات اتّخاذ القرارات وصلاحيّات رقابيّة مستقلّة.
ـ ما نلمّوش كلّ السّلط في يد رئيس الحكومة أو في يد حزب واحد

ـ ضرورة اعتماد أغلبيّة 50% +1 في تسمية الرّئاسات الثّلاث (المجلس التّأسيسي ورئاسة الجمهوريّة و رئاسة الحكومة) ونفس هذه الأغلبيّة في سحب الثّقة منهم.
ـ التّصويت على كلّ فصل من الدّستور بأغلبيّة الثّلثين
ـ ضرورة اعتماد الثّلثين في المصادقة على القوانين والدّستور في صورة قراءة ثانية
ـ ما نعطيوش جميع اختصاصات المجلس التّأسيسي إلى رئاسة الحكومة في صورة تعطّل السّير العادي لدواليب السّلط كيفما ينص عليه الفصل 8 من مشروع التّنظيم المؤقّت للسّلط العموميّة.
ـ ضرورة إقحام مجلّة الأحوال الشّخصيّة في القوانين الأساسيّة.
ـ الّي يدخل في الحكومة يخرج من المجلس الوطنيّ التّأسيسي.
ـ يعملولنا شان متاع تلفزة باش تعدّيلنا اللي يصير في المجلس الوطنيّ التّأسيسي


هذي مطالب سياسيّة بحته ما عندها حتّى أدنى ربع علاقة بالدّين ولاّ المعتقدات الشخصيّة. الإعتصام هذا قلّق برشا أطراف... و زيد على هذا جاو برشا معتصمين من الحوض المنجمي. في كل ليلة يصير إعتداء على المعتصمين بالحجر و فمّا شكون وصل كسرلهم الخيم متاعهم

الإعتصام المضاد

بدا نهار 3 ديسمبر، كيف جاو برشا ناس قال شنوّة إساندو في الحزب الّي عندو برشا كراسي، 89 من جملة 217 كرسي. الحاكم قسم لعباد على زوز، باش ما يصيروش مشاكل

جماعة الإعتصام المضاد كانو متكونين من جماعة التحرير والنهضة. وكانو ـ حسب أولاد باردو ـ معاهم برشا أولاد الحومة. مطلب الجماعة كان النقاب. واستعملو غناء الڢيراج باش إوصّلو صوتهم.
الناس هاذي اللّي تدّعي الإسلام و الأخلاق الحميدة كانو يستفزّو في المعتصمين الّي جاو إطالبو بالديمقراطيّة، حشّاكم إخرجو في صبع الوسط و يرميو في الحجر والدبابز.



اللّي صار صار

المعتصمين اللي يطالبو بالديمقراطيّة الحقيقيّة ما جاوبوش على الإستفزازات وتلفتو للمجلس. و ما طاحوش في الفخ رغم ذلك كلاو الكرد من عند أولاد الڢيراج

الصحافة الأجنبية تكلمت على نهار السبت، ومَيعت القضيّة ولخّصتها في مواجهة بين الإسلاميّن والعلمانيين

آش صاير توّة نهار 4 ديسمبر

بيان اعتصام باردو1
03 12 2011

اعتصام باردو 1 دخل في نهارو الرابع، و مزالو لعباد جايينو باش يظهرو مساندتهم.
يشاركو في الاعتصام برشة منظمات ملجتمع المدني و البطّالة متاع الحوض المنجمي وبلايص اخرى و معاهم جماعة من الاتحاد العام لطلبة تونس واحزاب و مواطنين مستقلّين على ما يجيو جماعة اخرين من بلايص اخرى ليّامات الجاية، لكلهم جاو باش يعملو پراسيون على نوّاب التأسيسي باش نخلطو نحققو اهداف الثورة و المطالب هوما


1. يعاودو يشوفولنا برنامج تنظيم السلط المؤقت اللّي حاسبينو النوّاب مالتحصيل الحاصل و هذا ماهو إلاّ ريسك متاع رجوع الدكتاتورية اللّي وراها حزب واحد يحكم بلّي يحب بلا رقابة و حاطط يديه على السلط التشريعية والتنفيذية والقضائية والإدارية والإعلامية.
2. يعاودو يشوفولنا زادة حكاية مشروع النظام الداخلي باش يفرضو انو القرارات ما تتعدّى كان بالثلثين و يحضرو استفتاء باش الشعب هو اللّي يصادق نهائيا عالدستور بكل ديموقراطية.
3. الثقة للحكومة تتعطى ب50%+1 و تتنّحى كيف كيف
4. مداولات المجلس و اللجان يلزمها تتعدّى فالتلفزة، و المحاضر يلزمها تكون على ذمّة الشعب
5. يحاكمو المجرمين اللّي قتلو الشهداء و يعطيو قدر للمجروحين و يعاونوهم
6. العدل بين الجهات و القسمة العادلة للثروات
7. الاستجابة لمطالب التشغيل في البلايص الكل و خاصة فاللّي عدّاو الكونكور متاع فسفاط ڨفصة
8. انّظفو القضاء متاعنا مالخمج و الفساد
9. نبداو انّظفو اداراتنا و مصالحنا مالفساد اللّي خلاّه النظام السابق
10. نوقفو خلاصات كريديات تونس البرّة
11. نقيّدو في دستورنا الجاي اللّي ما يلزمناش نتعاملو مع اسرائيل الصهوينية

هالاعتصام هوّ كمالة للّي بداه الشعب و سميناها ثورة و لّي ما كملتش !
باردو 1 ماهي الاّ عودة للشارع بعد الّي برشة حوايج الّي خرج على خاترهم الشعب عام التالي مازال ماصار فيها شي و هي الكرامة، الشوماج، الحرية، قطعان دابر الدكتاتورية...
باردو 1 واحد من الشعب ماهيش من حزب ! جبهة واحدة ما تمثلش احزاب.
هالاعتصام ينبه من دكتاتورية جديدة متغطية في ديموقراطية الاغلبية جابتها نتائج الانتخابات
في لخّر باردو 1 موجه للعباد الكل، للتوانسة الاحرار، ضد التهميش و التبلعيط اللّي ولاو يهددو في حرياتنا و حقوقنا و اكثر من هذا يلهيونا عالرسمي !

تعيش تونس
تعيش الثورة حتى النصر

لجنة اعتصام باردو1